Dost Ban Kar Bhi Nahiin Saath Nibhane Wala - Poetry
dost ban kar bhii nahiin saath nibhane wala
vahii andaaz hai zaalim kaa zamaanevaalaa
ab ise log samajhate hain giraftaar meraa
saKht nadiim hai mujhe daam main laanevaalaa
kyaa kahain kitane maraasim the hamaare is se
wo jo ik shaKhs hai monh pher ke jaanevaalaa
tere hote hue aa jaatii thii saarii duniyaa
aaj tanhaa hon to koii nahiin aanevaalaa
muntazir kis kaa hon TuuTii huii dahaliiz pe main
kaun aayegaa yahaan kaun hai aanevaalaa
main ne dekhaa hai bahaaron main chaman ko jalate
hai koii Khvaab kii taabiir bataanevaalaa
kyaa Khabar thii jo merii jaan main ghulaa hai itanaa
hai vahii mujh ko sar-e-daar bhii laane vaalaa
tum taqalluf ko bhii iKhalaas samajhate ho 'Faraz'
dost hotaa nahiin har haath milaanevaalaa
